Litsenziya shartnomasi

Oferta va uni qabul qilish

1. Ushbu hujjat [Kompaniya nomi] (STIR [STIR]; keyingi o‘rinlarda — Litsenziar) tomonidan O‘zbekiston Respublikasi Fuqarolik kodeksiga muvofiq e’lon qilingan ommaviy oferta bo‘lib, TuranShell dasturiy majmuasidan foydalanish huquqini berish to‘g‘risida shartnoma (keyingi o‘rinlarda — Shartnoma) tuzish taklifidir.
2. Oferta kompyuter klubi faoliyatini yurituvchi yuridik shaxslarga, yakka tartibdagi tadbirkorlarga va o‘zini o‘zi band qilgan shaxslarga (keyingi o‘rinlarda — Litsenziat yoki Klub) qaratilgan. Dastur tadbirkorlik faoliyatida foydalanish uchun mo‘ljallangan.
3. Oferta quyidagi harakatlardan biri bilan to‘liq va so‘zsiz qabul qilinadi (aksept):
   1. lk.turanshell.uz shaxsiy kabinetida ro‘yxatdan o‘tish: shartlarga rozilik katakchasini belgilash va telefon raqamini SMS kodi bilan tasdiqlash;
   2. PC dasturini (shell) o‘rnatishda o‘rnatuvchidagi shartlarga rozilik katakchasini belgilash;
   3. klub serverida o‘rnatilgan versiyada egasining hisobini yaratish;
   4. tarif bo‘yicha to‘lovni amalga oshirish.
4. Akseptni amalga oshirgan shaxs Litsenziat nomidan harakat qilishga vakolatli ekanini tasdiqlaydi. Vakolat bo‘lmasa, Shartnoma bo‘yicha majburiyatlar shu shaxsning o‘ziga o‘tadi.
5. Shartnoma aksept paytidan kuchga kiradi va Litsenziatning kabinetida hamda saytda ko‘rsatilgan shartlar bilan birga yagona hujjatni tashkil etadi. Shartnomaning joriy tahriri doimiy ravishda turanshell.uz/legal/ sahifasida joylashtiriladi; PDF nusxasi PC dasturi o‘rnatuvchisi ichida ham beriladi.
6. Shartnomaning ajralmas qismi bo‘lgan hujjatlar: Maxfiylik siyosati, Foydalanuvchi kelishuvi (Klub mijozlari uchun), saytdagi Talablar bo‘limi va kabinetdagi tariflar sahifasi.
7. O‘zbek tilidagi matn asosiy hisoblanadi; rus tilidagi matn tarjima bo‘lib, tafovut bo‘lsa o‘zbekcha matn ustun turadi.

Atamalar

1. Dastur — TuranShell dasturiy majmuasi: server qismi, ish paneli (admin.turanshell.uz yoki klub serveridagi panel), shaxsiy kabinet (lk.turanshell.uz), PC dasturi (shell) va unga xizmat qiluvchi Windows xizmati, o‘rnatuvchi, TuranGamer ilovasi, hujjatlar va yangilanishlar.
2. Bulut versiyasi — Dasturning server qismi Litsenziar serverlarida ishlaydigan va Klubga internet orqali kirish beriladigan foydalanish turi.
3. Klub serveridagi versiya — Dasturning server qismi Klubning o‘z kompyuterida o‘rnatilgan foydalanish turi.
4. Kabinet — lk.turanshell.uz manzilidagi shaxsiy kabinet: klub kartasi, obuna, to‘lovlar, hujjatlar.
5. PC (ish o‘rni) — Klubdagi o‘yin kompyuteri; Shell — PC’ga o‘rnatiladigan Dastur qismi (qulf ekrani, seans vaqti, o‘yinlar, bar, chat).
6. Obuna — muayyan PC soni uchun muayyan muddatga to‘langan foydalanish huquqi; Tarif — obunaning narxi va shartlari; Tarif davri — obuna to‘langan muddat.
7. Sinov davri — ro‘yxatdan o‘tgandan keyin Dasturdan bepul foydalanish davri (4-bo‘lim).
8. Mijoz (oxirgi foydalanuvchi) — Klub xizmatidan foydalanuvchi o‘yinchi yoki mehmon. Mijozning Dasturdan foydalanishi Foydalanuvchi kelishuvi bilan tartibga solinadi.
9. Klub ma’lumotlari — Klub Dasturga kiritgan yoki Dastur Klub faoliyati davomida yaratgan ma’lumotlar: mijozlar, seanslar, kassa, tovarlar, sozlamalar, jurnal.
10. Seans, tarif (klub tarifi), depozit, bonus, bron, smena, zal — Dasturdagi klub faoliyati tushunchalari, Dastur hujjatlaridagi ma’noda.
11. Oy — Tarif davrini hisoblashda 30 kalendar kun, agar kabinetda boshqacha ko‘rsatilmagan bo‘lsa.

Shartnoma predmeti

1. Litsenziar Litsenziatga Dasturdan ushbu Shartnomada belgilangan doirada foydalanish uchun oddiy (mutlaq bo‘lmagan) litsenziya beradi, Litsenziat esa pullik tarif bo‘yicha litsenziya haqini to‘laydi.
2. Ruxsat etilgan foydalanish usullari:
   1. bulut versiyasiga internet orqali kirish va undan tarifda ko‘rsatilgan PC soni doirasida foydalanish;
   2. klub serveridagi versiyani Klubga tegishli bitta server kompyuteriga o‘rnatish va ishlatish;
   3. Shell’ni Klubga tegishli PC’larga o‘rnatish, tarifda ko‘rsatilgan sondan oshmagan holda;
   4. ish paneli va kabinetdan Klub xodimlari tomonidan, Klub egasi bergan huquqlar doirasida foydalanish;
   5. TuranGamer ilovasini Klub mijozlariga taqdim etish.
3. Litsenziya Klubning tadbirkorlik faoliyatida foydalanish uchun beriladi. Litsenziyani boshqa shaxsga berish, sublitsenziya berish, ijaraga berish yoki sotish taqiqlanadi. Bir nechta klubga ega bo‘lgan Litsenziat har bir klubni kabinetda alohida ro‘yxatdan o‘tkazadi.
4. Taqiqlanadi: Dasturni dekompilyatsiya va disassemblyatsiya qilish, teskari muhandislik, manba kodini olish, o‘zgartirish, texnik himoya vositalarini chetlab o‘tish, litsenziya cheklovlarini aylanib o‘tish, Dastur asosida raqobatdosh mahsulot yaratish, Dastur nomi va belgilarini olib tashlash yoki o‘zgartirish.
5. Foydalanish hududi — O‘zbekiston Respublikasi. Boshqa davlatda foydalanish Litsenziar bilan alohida kelishiladi.
6. Litsenziya muddati Tarif davriga teng; Sinov davrida — Sinov davri muddatiga. Muddat tugagach foydalanish 6-bo‘limga muvofiq cheklanadi.
7. Litsenziya Dasturning yangilanishlariga ham taalluqli. Yangi versiya bilan qo‘shimcha shartlar e’lon qilinsa, ular yangi versiyadan foydalanish boshlanganda kuchga kiradi.
8. Dastur Litsenziatga faqat elektron shaklda beriladi: kabinetda kirish ochish, o‘rnatuvchi va shell’ni yuklab olish imkoni. Jismoniy tashuvchi berilmaydi.

Sinov davri

1. Kabinetda ro‘yxatdan o‘tgan har bir yangi kompaniya uchun ro‘yxatdan o‘tgan kundan boshlab 30 kalendar kunlik Sinov davri ochiladi. Sinov davrida Dasturning barcha imkoniyatlari 100 tagacha PC uchun bepul ishlatiladi.
2. Sinov davri to‘lovsiz, avtomatik ravishda pullik obunaga o‘tmaydi va bank kartasi ma’lumotlarini talab qilmaydi. Davom ettirish uchun Litsenziat kabinetda tarifni tanlab to‘laydi.
3. Sinov davri tugagach, to‘lov bo‘lmasa, 6-bo‘lim qoidalari qo‘llaniladi.
4. Sinov davri har bir Litsenziatga bir marta beriladi. Sinovni takroran olish maqsadida bir xil klubni qayta ro‘yxatdan o‘tkazish Shartnomani buzish hisoblanadi.
5. Litsenziar Sinov davrida ham Dasturning ishlashini 13-bo‘limdagi shartlar bilan ta’minlaydi, biroq Sinov davri uchun 13.5 va 13.6-bandlardagi ishlash ko‘rsatkichi kafolati va kompensatsiya qo‘llanilmaydi.

Tariflar va to‘lov

1. Litsenziya haqi kabinetda ko‘rsatilgan tariflar bo‘yicha hisoblanadi: bitta PC (ish o‘rni) uchun oylik stavka, PC soni va Tarif davriga ko‘paytiriladi. 3, 6 va 12 oylik davrlar uchun chegirma, promokodlar va aksiyalar kabinetda ko‘rsatilgan tartibda qo‘llanadi.
2. Narxlar O‘zbekiston so‘mida ko‘rsatiladi. Qo‘shilgan qiymat solig‘i: [QQS holati: narxga kiritilgan / soliq solinmaydi, asosi].
3. Buyurtma kabinetda rasmiylashtiriladi: Litsenziat PC sonini va Tarif davrini tanlaydi, Dastur yakuniy summani hisoblaydi va ko‘rsatadi. Kabinetda ko‘rsatilgan summa, PC soni va davr Shartnomaning shartlari hisoblanadi.
4. To‘lov usullari: kabinetdagi onlayn to‘lov (Payme, Click yoki kabinetda ko‘rsatilgan boshqa to‘lov tizimi) yoki Litsenziar taqdim etgan hisob-faktura bo‘yicha bank o‘tkazmasi. To‘lov mablag‘ Litsenziar hisobiga kelib tushgan paytdan amalga oshirilgan hisoblanadi.
5. Onlayn to‘lov uchun qonun talab qilgan hollarda fiskal chek shakllantiriladi va kabinetda ko‘rsatiladi (yoki ko‘rsatilgan aloqa kanaliga yuboriladi). Bank o‘tkazmasi bo‘yicha Litsenziar [5] ish kuni ichida hisob-faktura va bajarilgan ishlar dalolatnomasini elektron shaklda taqdim etadi. Litsenziat dalolatnomani [5] ish kuni ichida imzolamasa yoki asosli e’tiroz bildirmasa, u qabul qilingan hisoblanadi.
6. Obuna avtomatik uzaytirilmaydi va Litsenziatning kartasidan avtomatik yechilmaydi. Tarif davri tugashidan oldin kabinet va ish panelida eslatma ko‘rsatiladi.
7. Litsenziat nomidan uchinchi shaxs (shu jumladan jismoniy shaxs) to‘lov qilishi mumkin; bunda to‘lov Litsenziatning to‘lovi hisoblanadi.
8. Litsenziar tariflarni o‘zgartirishga haqli. Yangi narx kabinetda e’lon qilingan kundan boshlab yangi buyurtmalarga qo‘llanadi va to‘langan Tarif davriga ta’sir qilmaydi. Narx oshishi haqida Litsenziat kamida [15] kun oldin kabinetda xabardor qilinadi.
9. Tarif davri ichida PC sonini oshirish kabinetda qo‘shimcha buyurtma orqali amalga oshiriladi; qo‘shimcha PC’lar uchun haq joriy Tarif davrining qolgan qismiga mutanosib hisoblanadi. Tarif davri ichida PC sonini kamaytirish yoki davrni qisqartirish uchun to‘langan mablag‘ qaytarilmaydi.
10. To‘langan mablag‘ni qaytarish:
    1. Litsenziat Shartnomani o‘z xohishi bilan muddatidan oldin bekor qilsa, foydalanilmagan davr uchun mablag‘ qaytarilmaydi;
    2. Litsenziar Shartnomani Litsenziatning aybisiz bekor qilsa yoki Dasturni taqdim etishni to‘xtatsa, foydalanilmagan to‘liq oylar uchun mablag‘ [15] ish kuni ichida qaytariladi;
    3. to‘lov xato yoki ikki marta amalga oshirilgan bo‘lsa, ortiqcha summa murojaat asosida [10] ish kuni ichida qaytariladi.

Obuna muddati tugaganda

1. Tarif davri yoki Sinov davri tugab, to‘lov qilinmagan bo‘lsa, Dastur cheklangan rejimga o‘tadi: yangi seans ochib bo‘lmaydi va yangi PC qo‘shib bo‘lmaydi. Ochiq seanslar vaqti tugaguncha davom etadi; kassa, smenani yopish, hisobotlar va Klub ma’lumotlarini ko‘rish ishlayveradi.
2. Cheklangan rejimda Litsenziat istalgan vaqtda tarifni to‘lab to‘liq rejimga qaytishi mumkin; yangi Tarif davri to‘lov kunidan boshlanadi.
3. To‘lov Tarif davri tugaganidan keyin [60] kun ichida amalga oshirilmasa, Litsenziar Klub ma’lumotlarini o‘chirishga haqli. O‘chirishdan kamida [14] kun oldin Litsenziat kabinetda va ko‘rsatilgan aloqa kanali orqali ogohlantiriladi. Ogohlantirish davrida Litsenziat 15.7-bandga muvofiq ma’lumotlar nusxasini so‘rashi mumkin.
4. Klub serveridagi versiyada ma’lumotlar Klub kompyuterida turadi va o‘chirilmaydi; obuna tugaganda faqat Dastur imkoniyatlari 6.1-bandga muvofiq cheklanadi.

Texnik talablar va internet

1. Dasturdan foydalanish uchun Klub saytning «Talablar» bo‘limida ko‘rsatilgan shartlarni o‘zi ta’minlaydi: Windows 10/11 (64-bit) o‘rnatilgan PC’lar, lokal tarmoq, klub serveridagi versiya uchun doim yoqiq turadigan Windows kompyuter va PostgreSQL 15 yoki yangiroq ma’lumotlar bazasi.
2. Bulut versiyasi internetga bog‘liq. Klubning internet aloqasi uzilganda ish paneliga kirish, yangi seans ochish, kassa va bar amallari vaqtincha ishlamaydi. Ochiq seansning vaqti PC’ning o‘zida hisoblanadi va vaqt tugaganda PC qulflanadi; seans bo‘lmagan PC 15 soniya ichida qulflanadi; aloqa tiklangach PC serverga o‘zi qayta ulanadi. Litsenziat bu qoidani biladi va qabul qiladi; Litsenziar zaxira internet kanalini (masalan, LTE router) tavsiya qiladi.
3. Klub serveridagi versiyada kundalik ish (seanslar, kassa, bar, bron) internetsiz davom etadi; internet faqat qo‘shimcha xizmatlar (Telegram, Steam tekshiruvi, muqovalar, ovozli jumlalar, yangilanishlar) uchun kerak.
4. Litsenziat o‘z tarmog‘i, elektr ta’minoti, PC’lar va server kompyuterining sozligi, antiviruslar va Windows sozlamalari uchun javob beradi. Litsenziar Klub tomonidagi apparat va tarmoq nosozliklaridan kelib chiqqan to‘xtashlar uchun javob bermaydi.
5. Klub serveridagi versiyani Litsenziar masofadan (AnyDesk, RuDesktop yoki shunga o‘xshash vosita orqali) o‘rnatib beradi. Litsenziat masofaviy kirishni faqat o‘rnatish yoki yordam seansi davomida ochadi va uni istalgan vaqtda yopishga haqli.

Tomonlarning huquq va majburiyatlari

Litsenziar majburiyatlari

1. Aksept qilingandan keyin Litsenziatga kabinet, ish paneli va shell o‘rnatuvchisiga kirish berish; pullik tarif bo‘yicha — to‘lov kelib tushgan kundan 1 ish kuni ichida to‘liq rejimni ochish.
2. Dasturni Shartnoma muddati davomida ishlab turishini 13-bo‘limdagi shartlar bilan ta’minlash, texnik yordam ko‘rsatish va yangilanishlarni taqdim etish.
3. Klub ma’lumotlarini 9-bo‘lim va Maxfiylik siyosatiga muvofiq himoya qilish, ularni faqat Dasturni ishlatish, texnik yordam, xavfsizlik va qonun talabi doirasida ishlatish.
4. Bulut versiyasida ma’lumotlar bazasining zaxira nusxasini kamida kuniga bir marta olish va so‘nggi 30 nusxani saqlash.
5. Rejalashtirilgan texnik ishlar haqida kamida [24] soat oldin kabinetda xabar berish va ularni imkon qadar tungi soatlarda o‘tkazish.
6. Shartnoma shartlari, tariflar va Dasturning muhim o‘zgarishlari haqida 19-bo‘limga muvofiq xabar berish.

Litsenziar huquqlari

1. Dasturni takomillashtirish, imkoniyatlarni qo‘shish yoki o‘zgartirish, eskirgan imkoniyatlarni kamida [30] kun oldin xabar berib olib tashlash.
2. Litsenziat Shartnomani buzganda yoki to‘lov qilmaganda 15-bo‘limga muvofiq kirishni cheklash yoki to‘xtatib turish.
3. Tizim xavfsizligiga tahdid (hujum, buzilgan hisob, zararli dastur) aniqlanganda kirishni oldindan ogohlantirmasdan vaqtincha to‘xtatib, Litsenziatni darhol xabardor qilish.
4. Klub ma’lumotlariga texnik yordam so‘rovi doirasida, so‘rovni bajarish uchun zarur hajmda kirish.
5. Litsenziatning nomini va logotipini mijozlar ro‘yxatida ko‘rsatish — faqat Litsenziatning yozma (shu jumladan kabinet orqali) roziligi bilan.

Litsenziat majburiyatlari

1. Litsenziya haqini o‘z vaqtida to‘lash va kabinetdagi kompaniya, klub va aloqa ma’lumotlarini to‘g‘ri hamda dolzarb holda saqlash.
2. Dasturdan faqat qonuniy maqsadlarda va Shartnomada ruxsat etilgan usullarda foydalanish; Klub faoliyatiga oid qonun talablariga (iste’molchilar huquqlari, voyaga yetmaganlarni himoya qilish, savdo va soliq qoidalari, fiskallashtirish, reklama) mustaqil rioya qilish.
3. O‘z mijozlari oldida xizmat ko‘rsatuvchi sifatida javob berish: tariflar, depozit, bonus, bron, jarima va pulni qaytarish qoidalarini Klub belgilaydi va mijozlarga yetkazadi. Litsenziar Klub va mijoz o‘rtasidagi munosabatlarning tomoni emas.
4. Mijozlarni ro‘yxatdan o‘tish paytida Foydalanuvchi kelishuvi va Maxfiylik siyosati bilan tanishtirish, shu jumladan PC ekranini klub xodimi ko‘rishi mumkinligi va o‘yin saqlamalari serverga yuklanishi haqida xabardor qilish; 9-bo‘limdagi majburiyatlarni bajarish.
5. Xodimlarga faqat zarur huquqlarni berish, ishdan ketgan xodimning hisobini o‘chirish, egasining paroli va 24 xonali ulanish kodini sir saqlash. Litsenziat hisoblari orqali qilingan barcha harakatlar uchun Litsenziat javob beradi.
6. PC’larni masofadan ko‘rish va boshqarish imkoniyatidan faqat nosozlikni bartaraf etish va klub qoidalariga rioya qilinishini nazorat qilish uchun foydalanish; bu huquqni ishonchli xodimlargagina berish.
7. Klub akkauntlari (Steam, Epic, Riot va boshqalar) va o‘yinlar uchun tegishli litsenziyalar va platforma qoidalariga rioya qilish (11-bo‘lim).
8. Dasturdagi xato yoki zaiflikni aniqlaganda undan foydalanmaslik va [E-mail] orqali darhol xabar berish.
9. Litsenziar xodimlari bilan muloqotda haqorat, tahdid va odobsiz muomaladan tiyilish; takroriy buzilish Shartnomani bekor qilishga asos bo‘ladi.

Litsenziat huquqlari

1. Dasturdan Shartnoma doirasida foydalanish, tarifni o‘zgartirish, PC sonini oshirish, obunani uzaytirish.
2. Texnik yordam olish, xato haqida xabar berish va tuzatilishini talab qilish.
3. Klub ma’lumotlarini ish paneli orqali ko‘rish, sozlamalarni fayl orqali eksport qilish, Shartnoma tugaganda 15.7-bandga muvofiq ma’lumotlar nusxasini olish.
4. Shartnomani 15-bo‘limga muvofiq istalgan vaqtda bekor qilish.

Shaxsga doir ma’lumotlar

1. Klub mijozlari va xodimlarining Dasturga kiritiladigan shaxsga doir ma’lumotlariga nisbatan Litsenziat operator hisoblanadi: u ishlov berish maqsadini va tarkibini belgilaydi, qonun talab qilgan hollarda rozilik oladi va subyektlarning murojaatlariga javob beradi.
2. Bulut versiyasida Litsenziar bu ma’lumotlarga Litsenziatning topshirig‘i bilan ishlov beruvchi sifatida ishlov beradi. Topshiriq ushbu Shartnoma va Litsenziatning Dasturdagi harakatlari (sozlamalar, yozuvlar, buyruqlar) bilan beriladi. Klub serveridagi versiyada Litsenziar ishlov beruvchi emas; u ma’lumotlarga faqat Litsenziat so‘ragan yordam seansi davomida kiradi.
3. Litsenziar ishlov beruvchi sifatida:
   1. ma’lumotlarni faqat Dasturni ishlatish, texnik yordam, xavfsizlikni ta’minlash va qonun talabini bajarish uchun ishlatadi, o‘z maqsadlarida ishlatmaydi va uchinchi shaxslarga sotmaydi (Mijozning o‘zi TuranShell’ga bergan alohida reklama roziligi bundan mustasno);
   2. Maxfiylik siyosatida sanab o‘tilgan texnik va tashkiliy himoya choralarini qo‘llaydi;
   3. ma’lumotlar bazasini O‘zbekiston Respublikasi hududidagi serverlarda saqlaydi va chet elga uzatmaydi; Maxfiylik siyosatida ko‘rsatilgan xizmat ko‘rsatuvchilardan (subprotsessorlardan) foydalanadi va ro‘yxat o‘zgarganda Litsenziatni kamida [15] kun oldin xabardor qiladi;
   4. ma’lumotlarga kirish huquqi bo‘lgan xodimlarni maxfiylikni saqlash majburiyati bilan bog‘laydi;
   5. ma’lumotlar xavfsizligi buzilganini aniqlaganda Litsenziatni [72] soat ichida xabardor qiladi va oqibatlarni bartaraf etishda yordam beradi;
   6. subyektlarning murojaatlarini bajarishda (ma’lumotlar bilan tanishtirish, tuzatish, o‘chirish) Litsenziatga yordam beradi;
   7. Shartnoma tugagach ma’lumotlarni 15.7 va 6.3-bandlarga muvofiq qaytaradi va o‘chiradi.
4. Litsenziat operator sifatida:
   1. ma’lumotlarni qonuniy asosda to‘plashni, mijozlarni Foydalanuvchi kelishuvi va Maxfiylik siyosati bilan tanishtirishni va zarur hollarda rozilik olishni ta’minlaydi;
   2. voyaga yetmaganlarning ma’lumotlarini qonun talablariga muvofiq (ota-ona yoki vasiy roziligi bilan) kiritadi;
   3. xodimlarga huquqlarni faqat zarur hajmda beradi va PC ekranini ko‘rish, mijoz ma’lumotlarini eksport qilish kabi imkoniyatlardan faqat qonuniy maqsadlarda foydalanadi;
   4. mijoz haqidagi ichki izohlarda haqoratli yoki qonun bilan taqiqlangan ma’lumotlarni yozmaydi;
   5. shaxsga doir ma’lumotlar bazasini davlat reyestrida ro‘yxatdan o‘tkazish talabi qo‘llanilsa, uni o‘z faoliyatiga nisbatan mustaqil bajaradi;
   6. subyektlar bilan bog‘liq nizolarni mustaqil hal qiladi va Litsenziarning ishlov beruvchi sifatida javobgarligiga sabab bo‘lgan o‘z qonunbuzarligi uchun Litsenziarga yetkazilgan zararni qoplaydi.
5. Kabinetdagi hisob (ro‘yxatdan o‘tgan Klub egasining kirish ma’lumotlari), obuna va to‘lovlarga oid ma’lumotlarga nisbatan Litsenziar operator hisoblanadi va ularga Maxfiylik siyosatiga muvofiq ishlov beradi.
6. Maxfiylik siyosati Shartnomaning ajralmas qismi bo‘lib, Shartnomani qabul qilish Litsenziat u bilan tanishganini tasdiqlaydi.

PC dasturi va Windows xizmati

1. Shell PC’ning umumiy foydalanish rejimini ta’minlaydi va buning uchun operatsion tizim darajasida ishlaydi. Litsenziat quyidagilarni biladi va rozi:
   1. shell PC’ni seansdan tashqari vaqtda qulflaydi; yopib qo‘yilsa, Windows xizmati uni qayta ishga tushiradi;
   2. Windows xizmati tizim (SYSTEM) huquqlari bilan ishlaydi va Klub sozlamalariga qarab Ctrl+Alt+Del menyusidagi ayrim bandlarni, reyestr muharriri, boshqaruv paneli, Win+R kabi yo‘llarni yopadi, tanlangan disklarni yashiradi, USB tashuvchilarni va brauzerdan yuklab olishni bloklashi mumkin;
   3. PC ulanganda serverga MAC manzil, kompyuter nomi, apparat tarkibi va shell versiyasi yuboriladi, keyin har 15 soniyada holat va faol oyna nomi yuboriladi;
   4. Klub xodimi ish panelidan PC ekranini ko‘rishi, boshqarishi, fayllarni yuborishi va olishi, dasturlarni yopishi, PC’ni qulflashi, qayta yuklashi va o‘chirishi mumkin; har bir amal jurnalga yoziladi;
   5. seans tugagach launcherlardagi kirish holati PC yoqilgandagi holatga qaytariladi;
   6. shell va xizmat serverdan yuklab olingan va nazorat yig‘indisi (SHA-256) tekshirilgan yangilanishlarni avtomatik o‘rnatadi.
2. Shell o‘rnatuvchisi ishga tushirilganda shartlar ro‘yxati va rozilik katakchasi ko‘rsatiladi, Shartnomaning PDF nusxasi o‘rnatuvchi ichida beriladi. O‘rnatishni davom ettirgan shaxs Litsenziat nomidan harakat qilayotganini tasdiqlaydi.
3. Shell faqat Litsenziatga tegishli yoki uning qonuniy egaligidagi PC’larga o‘rnatiladi. Begona kompyuterga o‘rnatish taqiqlanadi.
4. Shell PC’dagi boshqa dasturlar, o‘yinlar, drayverlar va Windows yangilanishlari bilan har doim ham mos kelmasligi mumkin. Litsenziat shell’ni ishlab chiqarish muhitiga tarqatishdan oldin bir nechta PC’da sinab ko‘rishi tavsiya etiladi.
5. Shell’ni PC’dan olib tashlashni Klub xodimi PC’ning o‘zida, «Yuqori kirish» rejimida (Ctrl+Alt+P va xodim paroli bilan yoki ish panelidan ochiladi) buyruq berib bajaradi: Windows qobig‘i qaytariladi, cheklovlar olib tashlanadi, xizmat va fayllar o‘chiriladi. PC yozuvi ish panelida alohida o‘chiriladi.

Klub kontenti va uchinchi shaxs dasturlari

1. Klub Dasturga kiritgan kontent (yangiliklar, fon rasmlari, tovar rasmlari, klub rasmlari va logotipi, o‘yin muqovalari, ovozli jumlalar matni) uchun Klub to‘liq javob beradi: unga huquqlarga ega bo‘lishi, u qonunga, uchinchi shaxslar huquqlariga va reklama qoidalariga zid bo‘lmasligi kerak. Litsenziar qonunga zid kontent haqida xabar olganda uni [3] ish kuni ichida o‘chirishga haqli.
2. O‘yinlar, launcherlar va boshqa uchinchi shaxs dasturlari Dasturning qismi emas. Ularni o‘rnatish, litsenziyalash va foydalanish qoidalariga rioya qilish Klub zimmasida. Litsenziar bu dasturlarning ishlashi, mavjudligi va platforma qoidalarining o‘zgarishi uchun javob bermaydi.
3. Dasturda Klubning o‘yin platformalaridagi akkauntlari (Steam, Epic, Battle.net, Riot va boshqalar) saqlanishi va PC’ga uzatilishi mumkin. Litsenziat biladiki, bu akkauntlarning parollari ish panelida tegishli huquqi bor xodimlarga ko‘rinadi, va bu huquqni faqat ishonchli xodimlarga beradi. Akkauntlardan platforma qoidalariga mos foydalanish va ularga qo‘llanilgan cheklovlar (ban) uchun Klub javob beradi.
4. Tashqi xizmatlar (Telegram, Eskiz, Payme, Click, Steam, SteamGridDB, VoiceLab, fiskallashtirish operatori (Uzum Fiskalizatsiya), xarita xizmatlari) o‘z shartlari asosida ishlaydi. Klub bu xizmatlarni o‘z hisobi va kalitlari bilan ulaydi; ularning ishlamay qolishi Litsenziarning majburiyatlarini buzish hisoblanmaydi.
5. Klub serveridagi versiyada Klub Telegram orqali HUMO kartasi tushumlarini kuzatishni yoqsa, u o‘z serveridagi Dasturga o‘zining Telegram hisobini o‘zi ulaydi (sessiya fayli Klub kompyuterida turadi) va ulanishni istalgan vaqtda Telegram sozlamalari orqali bekor qilishi mumkin. Bulut versiyasida bu imkoniyat taqdim etilmaydi.

Intellektual mulk va ma’lumotlarga egalik

1. Dasturga, uning barcha qismlariga, manba kodiga, dizayniga, hujjatlariga, TuranShell va TuranGamer nomlariga bo‘lgan mutlaq huquqlar Litsenziarga tegishli va Shartnoma bo‘yicha Litsenziatga o‘tmaydi. Litsenziat faqat 3-bo‘limda ko‘rsatilgan foydalanish huquqini oladi.
2. Klub ma’lumotlari Litsenziatga tegishli. Litsenziar ularga faqat Shartnomada ko‘rsatilgan maqsadlarda kiradi va Litsenziatning roziligisiz uchinchi shaxslarga bermaydi (qonun talabi bundan mustasno).
3. Litsenziar Dasturni takomillashtirish uchun shaxsni aniqlab bo‘lmaydigan texnik ma’lumotlardan (versiyalar, xatolar haqidagi hisobotlar, imkoniyatlardan foydalanish soni, umumlashtirilgan statistika) foydalanishga haqli. Bunday statistikada Klub nomi va mijoz ma’lumotlari ko‘rsatilmaydi.
4. Litsenziat yuborgan takliflar va fikr-mulohazalardan Litsenziar Dasturni yaxshilash uchun cheklovsiz va haq to‘lamasdan foydalanishi mumkin.
5. Dasturda uchinchi shaxslarning ochiq litsenziyali komponentlari ishlatiladi; ularning litsenziyalari hujjatlarda ko‘rsatiladi va o‘z shartlari bilan amal qiladi.

Texnik yordam, yangilanishlar va ishlash kafolati

1. Texnik yordam [Telegram / telefon / e-mail] orqali [ish kunlari 10:00–19:00] (Toshkent vaqti) ko‘rsatiladi. Klub ishini to‘xtatib qo‘ygan nosozliklar haqidagi murojaatlarga [2] soat ichida, boshqa murojaatlarga [1] ish kuni ichida javob beriladi.
2. Yordam Dasturning o‘zi bo‘yicha ko‘rsatiladi. Klub tarmog‘i, Windows, drayverlar, o‘yinlar va uchinchi shaxs xizmatlarini sozlash bo‘yicha yordam Litsenziarning ixtiyorida yoki alohida kelishuv asosida beriladi.
3. Yangilanishlar Shartnoma muddati davomida qo‘shimcha haqsiz beriladi. Bulut versiyasi Litsenziar tomonidan yangilanadi; shell va xizmat serverdan avtomatik yangilanadi; klub serveridagi versiya Litsenziat roziligi bilan masofadan yangilanadi.
4. Rejalashtirilgan texnik ishlar 8.5-bandga muvofiq oldindan e’lon qilinadi va kutilayotgan ishlamay turish vaqtiga kirmaydi.
5. Litsenziar bulut versiyasining oylik ishlash ko‘rsatkichini kamida [99,0] % darajada ta’minlashga intiladi. Ko‘rsatkichga rejalashtirilgan ishlar, fors-major, uchinchi shaxs xizmatlarining (internet provayderlari, Cloudflare, hosting, to‘lov tizimlari) nosozliklari va Litsenziat tomonidagi sabablar kirmaydi.
6. Ko‘rsatkich Litsenziarning aybi bilan bajarilmasa, Litsenziat murojaati asosida Tarif davri ishlamay turgan vaqtning [ikki] baravariga bepul uzaytiriladi. Bu Litsenziatning ishlamay turish uchun yagona talab usuli hisoblanadi.

Javobgarlik

1. Dastur «qanday bo‘lsa shunday» beriladi. Litsenziar Dastur Litsenziatning barcha kutganlariga javob berishini, uzluksiz va xatosiz ishlashini, har qanday apparat va dastur bilan mos kelishini kafolatlamaydi; biroq aniqlangan xatolarni oqilona muddatda tuzatish majburiyatini oladi.
2. Litsenziar quyidagilar uchun javob bermaydi:
   1. Klub xodimlari va mijozlarining harakatlari, shu jumladan masofadan boshqarish va Klub ma’lumotlarini noto‘g‘ri ishlatish;
   2. Litsenziat tomonidagi apparat, tarmoq, elektr va internet nosozliklari, shuningdek uchinchi shaxs xizmatlarining ishlamay qolishi;
   3. Litsenziat hisoblariga parol yoki kodning sir saqlanmagani tufayli begona kirish;
   4. Klub bilan uning mijozlari, xodimlari, davlat organlari va boshqa uchinchi shaxslar o‘rtasidagi nizolar;
   5. boy berilgan foyda, obro‘ga zarar, bilvosita zarar.
3. Litsenziarning Shartnoma bo‘yicha jami javobgarligi har qanday holatda Litsenziat talab qo‘yilgan oydan oldingi [3] oy ichida to‘lagan litsenziya haqi summasi bilan cheklanadi. Sinov davrida javobgarlik [bir oylik minimal tarif] summasi bilan cheklanadi.
4. Litsenziat Shartnomani yoki qonunni buzishi natijasida Litsenziarga qo‘yilgan uchinchi shaxslar va davlat organlarining talablari bo‘yicha zararni (jumladan jarima va oqilona yuridik xarajatlarni) qoplaydi.
5. Litsenziyadan tashqarida foydalanish (masalan, tarifda ko‘rsatilgan sondan ko‘p PC, himoyani chetlab o‘tish, tarqatish) Litsenziarning mutlaq huquqini buzish hisoblanadi va qonunda nazarda tutilgan javobgarlikka olib keladi.
6. Cheklovlar qonun bilan cheklab bo‘lmaydigan javobgarlikka (qasddan yetkazilgan zarar) taalluqli emas.

To‘xtatib turish va bekor qilish

1. Litsenziar quyidagi hollarda Litsenziatni xabardor qilib kirishni to‘xtatib turishga haqli: to‘lov muddati o‘tgan (6-bo‘lim); Dasturdan qonunga zid foydalanish yoki himoyani chetlab o‘tish; tizim xavfsizligiga tahdid; Shartnoma buzilishi xabardan keyin [5] ish kuni ichida bartaraf etilmagan.
2. Litsenziat Shartnomani istalgan vaqtda kabinet orqali yoki [E-mail] manziliga xabar yuborib bekor qilishi mumkin. Foydalanilmagan davr uchun mablag‘ 5.10-bandga muvofiq qaytariladi yoki qaytarilmaydi.
3. Litsenziar Shartnomani quyidagi hollarda bir tomonlama bekor qilishi mumkin: Shartnoma jiddiy buzilib, xabardan keyin [10] kun ichida bartaraf etilmasa; Litsenziat Dasturdan [6] oydan ortiq foydalanmasa va to‘lov qilmasa; 8-bo‘limdagi muomala qoidalari takroran buzilsa. Boshqa hollarda Litsenziar Shartnomani kamida [30] kun oldin xabar berib bekor qilishi mumkin.
4. Litsenziar Dasturni taqdim etishni butunlay to‘xtatishga qaror qilsa, Litsenziatlarni kamida [60] kun oldin xabardor qiladi va ma’lumotlar nusxasini olish imkonini beradi.
5. Shartnoma bekor qilinganda Litsenziat Dasturdan foydalanishni to‘xtatadi, shell’ni PC’lardan olib tashlaydi va klub serveridagi versiyani o‘chiradi (Klub ma’lumotlarining o‘z nusxasini saqlab qolish huquqi bilan).
6. Bekor qilish to‘lov qarzlarini va Shartnoma amal qilgan davrda yuzaga kelgan javobgarlikni bekor qilmaydi. 9, 12, 14, 16 va 20-bo‘limlar Shartnoma tugaganidan keyin ham amal qiladi.
7. Bulut versiyasida Litsenziat Shartnoma tugagan kundan [30] kun ichida Klub ma’lumotlarining nusxasini so‘rashi mumkin; Litsenziar uni [10] ish kuni ichida umumiy qabul qilingan elektron formatda (ma’lumotlar bazasi eksporti yoki jadval fayllari) taqdim etadi. Shundan so‘ng ma’lumotlar 6.3-bandga muvofiq o‘chiriladi; zaxira nusxalardan [90] kun ichida chiqib ketadi.

Maxfiylik

1. Tomonlar Shartnoma davomida bir-biridan olgan oshkor etilmagan ma’lumotlarni (Dasturning ichki tuzilishi va kalitlari, Klubning moliyaviy ko‘rsatkichlari, mijozlar bazasi, tijorat shartlari) sir saqlaydi va faqat Shartnomani bajarish uchun ishlatadi.
2. Maxfiylik majburiyati ommaga ma’lum bo‘lgan, tomon mustaqil yaratgan yoki qonuniy yo‘l bilan uchinchi shaxsdan olgan ma’lumotlarga, shuningdek qonun yoki vakolatli organ talabi bo‘yicha oshkor etishga taalluqli emas; bunday talab haqida imkon bo‘lsa boshqa tomon xabardor qilinadi.
3. Majburiyat Shartnoma tugaganidan keyin [3] yil davomida saqlanadi.

Fors-major

1. Tomonlar o‘z majburiyatlarini oldindan ko‘rib bo‘lmaydigan va yengib bo‘lmaydigan holatlar (tabiiy ofat, yong‘in, epidemiya, harbiy harakatlar, ommaviy tartibsizliklar, davlat organlarining taqiqlovchi hujjatlari, internetning mintaqaviy uzilishi, ma’lumotlar markazidagi avariya) tufayli bajarmagani uchun javob bermaydi.
2. Bunday holat yuz bergan tomon boshqa tomonni [5] ish kuni ichida xabardor qiladi; majburiyat muddati holat davom etgan vaqtga uzaytiriladi. Holat [2] oydan ortiq davom etsa, har bir tomon Shartnomani bekor qilishga haqli.
3. To‘lov uchun mablag‘ yo‘qligi fors-major hisoblanmaydi.

Xabarlar

1. Litsenziar Litsenziatga xabarlarni kabinetdagi bildirishnomalar, ro‘yxatdan o‘tgan telefon raqamiga SMS yoki kabinetda ko‘rsatilgan e-mail va messenjer orqali yuboradi. Kabinetda ko‘rsatilgan yoki SMS bilan yuborilgan xabar yuborilgan kundan keyingi ish kunida olingan hisoblanadi.
2. Litsenziat Litsenziarga xabarlarni [E-mail] manziliga yoki [Telefon] raqamiga yuboradi. Shartnomani bekor qilish va da’vo xatlari e-mail orqali yoki yozma shaklda yuboriladi.
3. Litsenziat aloqa ma’lumotlarining dolzarbligi uchun javob beradi; eskirgan manzilga yuborilgan xabar olingan hisoblanadi.

Shartnomani o‘zgartirish

1. Litsenziar Shartnomaga bir tomonlama o‘zgartirish kiritishga haqli. Yangi tahrir versiya raqami va sanasi bilan turanshell.uz/legal/ sahifasida e’lon qilinadi.
2. Litsenziatning majburiyatlarini kengaytiradigan yoki huquqlarini toraytiradigan o‘zgartirishlar haqida to‘lov qilgan Litsenziatlar kamida [15] kun oldin kabinetda xabardor qilinadi. Litsenziat yangi tahrirga rozi bo‘lmasa, u kuchga kirgunga qadar Shartnomani bekor qilishi mumkin; bu holda foydalanilmagan to‘liq oylar uchun mablag‘ qaytariladi.
3. Yangi tahrir kuchga kirgandan keyin Dasturdan foydalanishni davom ettirish unga rozilik hisoblanadi. Amaldagi Tarif davri uchun narx o‘zgarmaydi.

Nizolar va qo‘llaniladigan qonun

1. Shartnomaga O‘zbekiston Respublikasi qonunchiligi qo‘llaniladi.
2. Nizolar avval muzokaralar yo‘li bilan hal qilinadi. Tomon yozma da’vo (e-mail orqali yoki pochta bilan) yuboradi; boshqa tomon unga 30 kalendar kun ichida javob beradi.
3. Kelishuvga erishilmasa, nizo yuridik shaxslar va yakka tartibdagi tadbirkorlar bilan O‘zbekiston Respublikasining Litsenziar joylashgan yerdagi vakolatli iqtisodiy sudida, jismoniy shaxslar bilan esa qonunda belgilangan sudlovga taalluqlilik bo‘yicha ko‘rib chiqiladi.
4. Shartnomaning biror qoidasi haqiqiy emas deb topilsa, qolgan qoidalar kuchini saqlab qoladi.

Litsenziar rekvizitlari

1. Nomi

   [Kompaniya nomi]

   STIR

   [STIR]

   Ro‘yxatdan o‘tish raqami

   [davlat reyestri raqami]

   Manzil

   [Manzil]

   Bank rekvizitlari

   [hisob raqami, bank nomi, MFO]

   E-mail

   [E-mail]

   Telefon

   [Telefon]

   Sayt

   turanshell.uz